Ég er s.s. búin að vera lesa bókina "Franskar konur fitna ekki" og hreyfst svona svakalega af henni. Hér ætla ég að skrá skref fyrir skref hvernig þetta virkar.


Skref 1:
Skráðu næstu 3 vikurnar niður hjá þér eftirfarandi hluti:

1. Hvað borðaðir þú þessa daga?

2. Klukkan hvað borðaðiru?

3. Við hvaða aðstæður borðaðir þú? Þ.e. við matarborðið, í sófanum fyrir framan sjónvarpið, á hlaupum, við tölvuna, inn í bíl o.s.frv.


Svo ég vitni nú aðeins í Ágústu Johnsen bókina:

4. Hvernig leið þér eftir hverja máltíð.


Eva: Ég ætla að láta það nægja bara að skoða síðustu 3 vikur hjá mér sem ég hef skrifað hér. Veit nokkurn vegin alveg hvernig mér leið, við hvaða aðstæður o.fl.




Skref 2:
Skoðaðu núna þessar 3 vikur ... og gerðu eftirfarandi hluti:

1. Reyndu að finna skaðvaldana þína, hvað er það sem þú mættir sleppa í 3 mánuði eða minnka verulega? Þú getur líka fundið einhvern staðgengil.


Eva: Skaðvaldar mínir í matarræðinu eru eftirfarandi:

- Of stórir skammtar á milli máltíða og í aðalmáltíðum. Miða á við 100 gr. af kjöti t.d. eða reikna einn skammt af mat við hnefann á þér. Í líkama fyrir lífið á t.d. að borða alltaf einn hnefa af próteini, einn af kolvetnum og grænmeti (eins mikið og þú vilt).
- Pizza!
- Brauð í öllum myndum!
- Unnar matvörur, mættu vera mikið ferskari
- Tilbúnir réttir, úr búðum, t.d. Sómi, þó svo það séu "hollustu réttirnir" hjá þeim
- Of stórir pastaskammtar, þó ég borði alltaf heilhveiti pasta
- Snakk (flögur o.fl.)
- Nammið í vinnunni, bæði piparbrjóstsykrar og súkkulaði
- Pepsi max eða Coke light
- Bjór þegar ég fæ mér í glas
- Borða við sjónvarpið eða með lesefni í formi tölvu eða blaða. Í bókinni segir að þú eigir alltaf að borða við "matarborðið", helst í góðra vina hópi, með því að leggja flott á borðið og njóta hvers bita.
- Nammidagurinn verður að nammihelgi.


Því hef ég ákveðið að í þrjá mánuði (á endurmótunartímanum)  eða til 1. nóvember mun ég:

- Algjörlega hætta að borða pítsu. Staðgengillinn mun verða spelt pítsa, en hana má ég fá mér mesta lagi einu sinni í viku. Það er í þessa þrjá mánuði.

- Algjörlega hætta að borða snakk og nammi á virkum dögum! Í staðinn má ég fá mér t.d. niðurskorið grænmeti með sýrðum rjóma (5-10% fitu) eða ávexti. Get líka fengið með ristaðar sojabaunir eða próteinsúkkulaði.

- Algjörlega hætta að borða franskar! (þó þær séu ekki mikið á mínum matseðli - þær eru bara óþverri í magann). Þarf ekki staðgengil fyrir þær.

- Algjörlega að hætta að fara á skyndibitastaði (McDonalds, KFC, Pizzastaðir o.s.frv) eða kaupa tilbúna rétti út í búð. Ef ég hef ekki tíma til að elda þá eru hollir skyndibitastaðir staðgengillinn, það eru t.d. Booztbarinn, Salatbar í búðum, Culia Can, Asískir staðir (hollt þá) og Subway (salat). Í bókinni er nefnilega talað um að þú eigir helst að matrétta alla réttina þína sjálf svo þú vitir hvað er í þeim, líka því þá nýtur þú matarins betur, mér finnst það t.d. það skemmtilegasta sem ég geri, þ.e. að elda og baka.

- Minnka brauð mjög mikið. Hámark ein sneið á dag, helst spelt eða gróft. Og ekki láta bæði smjör og ost, heldur annað hvort á það, þ.e. aðeins eitt álegg á brauðið og lítið af því. Á laugardögum / nammidögum má ég borða tvær sneiðar og tvö álegg.

- Ef ég er að DEYJA úr nammiþörf og er hreinlega á leiðinni út í búð að kaupa nammið, þá verð ég að finna hollari kost, t.d. kókosbollu, hollar múffur t.d., eða 70-90% hreint súkkulaði. Og aðeins eina einingu! T.d. einn munnbita af súkkulaði, eða eina kókosbollu, eða eina múffu.

- Um helgar má ég borða eina nammieiningu, hún má vera í formi súkkulaðistykkis, bland í poka eða eftirrétts. Eitthvað af þessu.

- Minnka Pepsi max og Coke light neyslu til muna! Byrja fyrstu vikuna á að hafa hámark 300 ml. á dag, næstu viku verður það mesta lagi 6 daga í viku, þriðju vikuna mesta lagi 5 daga í viku, fjórðu vikuna mesta lagi 4 daga í viku, fimmtu vikunan mesta lagi 3 daga í viku, sjöttu vikuna mesta lagi 2 daga í viku, sjöundu vikuna mesta lagi 1 dag í viku. Þegar komnir eru svo 2 mánuðir, eða 8 vikur, þá vonandi nægir þessi eini dagur eða þá að ég get algjörlega sleppt þessum ósið.

- No more Beer. Ef ég læt það eftir mér þá er það mesta lagi eitt stykki af Víking lite og ég verð að fórna einhverju öðru í staðinn, t.d. 2 hvítvínsglösum ;) Og það er jafnframt bara einu sinn í viku sem ég má það.

- Það er bara einn nammidagur í viku! Ef ég stend ekki við þetta, þá verð ég að hegna sjálfri mér með vatnsmelónuhreinsun í jafn marga daga og ég fór yfir markið.

- Prófa mig áfram í að gera matinn sem ferskastan og hollastan. Mig langar jafnframt að miðla þeim uppskriftum hingað inn.

- Halda áfram með matardagbókina mína.

- Hætta að borða fyrir framan sjónvarpið eða með lesefni. Ég verð að leggja á borð sérstaklega heima, annað kannski í vinnunni hehe :) Vera dugleg að bjóða fólki í mat, til þess að fá félagsskapinn, annars má ég hafa kveikt á sjónvarpinu en borða við matarborðið.

- Ef ég svindla, þá skal ég gjalda. Ef ég tek t.d. tvo nammidaga eða svík eitthvað á þessum lista, þá verð ég bara að gjöra svo vel og fara í vatnsmelónuhreinsunina aftur (sjá hér að neðan).

- Pastaskammturinn má ekki vera stærri en 100 gr. Þá soðið!

Mottó: Ef þú leyfir þér eitthvað, þá verðuru að sleppa einhverju öðru. Þetta jafnvægi sem franskar konur kunna svo vel. Líka talað um það í "Munkinum sem seldi sportbílinn sinn", en þá er talað um að hegna sér fyrir það ef maður stendur ekki við markmið sín, t.d. ef þeir fengu neikvæða hugsun í kollinn þá var það beint undir ískaldan foss. Ef ég fæ mér t.d. eftirrétt þá má ég ekki fá mér bailys glas með því, velja - þó svo það sé nammidagur! Ef ég fæ mér brauð fyrir eða með matnum á nammidag, þá má ég ekki fá mér vín með matnum.



2. Gæti verið að þú sért að borða eða drekka mikið á kvöldin? Athugaðu það að gosdrykkir, kaffi o.s.frv. eða matur 1-2 klst. áður en þú ferð að sofa gera það að verkum að þú átt erfitt með að sofna o.s.frv.

Eva: Það á ég sko til að gera! Ætla að venja mig á að fá mér mesta lagi vatnsglas eða tebolla 1-2 klst. áður en ég fer að sofa. Jafnframt ætla ég að setja mér það markmið að borða fyrir kl. 20:00 á kvöldi.



3. Gætir þú bætt við einhverri hreyfingu? Hún þarf ekki að vera mikil bara einhver smá hreyfing á hverjum degi. T.d. með því að fara upp stigann í stað þess að taka lyftuna, leggja bílnum aðeins lengra frá en venjulega o.s.frv. Það væri kjörið fyrir þig sérstaklega að taka minnst 20 mín göngu/skokk/æfingu á fastandi maga á morgnanna. Getur þú jafnvel labbað í vinnuna?

Eva: Ég hreyfi mig reyndar mjög mikið, en ég á það til að vera löt að fara brenna. Fer í einkþjálfun 3 x í viku (4 tímar) og það er aðallega til að lyfta lóðum. Fimleikarnir byrja reyndar í ágúst, þannig að þá bætast við 6 klst. í viðbót við hreyfingu vikunnar. Þrátt fyrir það ætla ég að setja mér eftirfarandi reglur:

1. Bannað að skrópa í einkþjálfun, nema afsökunin sé mjög góð. Hún þyrfti að vera veikindi, útlandaferð o.s.frv. Ef ég er hinsvegar í útlöndum, þá verð ég að taka bootcamp bókina mína með mér og taka prógram í henni sama dag og ég átti að vera í einkaþjálfun og helst á sama tíma. Jafnframt skal ég reyna að fá annan tíma í staðinn ef ég kemst ómögulega.

2. Ég verð að vakna alla aðra morgna og taka 30-60 mín æfingu, í hvaða formi sem er, á fastandi maga. Sunnudagar eru hvíldardagar. Verð s.s. að vakna mánudaga, miðvikudaga og föstudaga.

3. Hætta að taka lyftu. Það myndi muna miklu bara í vinnunni. Eina afsökunin eru fullar hendur.

4. Taka göngur í hádeginu. Þó þær séu ekki nema 10 mínútur, aðeins að fá ferskt loft og súrefni og smá hreyfingu.

5. Reyna að labba í stað þess að keyra. Ef ég þarf t.d. aðeins að skreppa stutta fjarlægð þá að sleppa bílnum!




Skref 3:
Núna er kominn tími til að taka 2 daga afeitrun! Þetta er í rauninni fyrsta skrefið á matarræðinu sjálfu.


Í bókinni er mælt með Töfrablaðlaukssúpu en jafnframt er sett fram uppskrift af Mimosa súpu sem virkar líka ef þú fílar ekki bragðið á blaðlaukinum. Hér er uppskriftin af Töfrablaðlaukssúpunni og aðferðinni með henni:


1 kg. af blaðlauk

Skerðu grænustu endana af lauknum. Skolaðu laukana vel og settu í pott (ég skar hann í bita fyrst) og settu vatn í þannig að það fljóti yfir pottinn. Farðu upp að suðu og leyfðu þeim þá að malla loklausa í 20-30 mín. Þú sigtar seyðið frá lauknum og lætur í aðskilin box.

Seyðið (einn bolla) drekkur þú á 2-3 tíma fresti fram að kvöldmat annars dags. 3 á dag eða þegar hungrið steðjar að þá áttu að borða laukana sjálfa (hálfan bolla), út á þá máttu setja örlitla extra virgin oil, salt og pipar og sítrónudropa.

Í kvöldmat á öðrum degi máttu fá þér einn kjötbita (munið 100 gr.) með tvenns lags gufusoðnu grænmeti en út á það má bæta smá smjörklípu.

Með þessu ættir þú að vera búin að losa þig jafnvel við 1 kg.



Eva: Ég meikaði ekki Töfrablaðlaukssúpuna, þannig að ég ákvað að fara aðra leið, en hún er eftirfarandi:

Keyptu þér tvær litlar vatnsmelónur / eða eina stóra og skerðu þær niður í bita. Borðaðu tvo bolla á 2 tíma fresti fram að kvöldmat annars dags. Fáðu þér þó stærri skammta í morgunmat, hádegismat og kvöldmat. Í kvöldmat á öðrum degi grillaðu þér þá eina kjúklingabringu (með örlitlu bbq) og fáðu þér einhverja góða grænmetisblöndu með!

Ég mæli þó með því að ef þú ert að taka æfingu að borða prótein eftir hana, þannig að ég fæ mér eftir æfinguna boozt en uppskriftin á honum er eftirfarandi:

170 gr. hreint skyr (ekkert .is bull, með viðbættum sykri ógeð!)
Hálfur banani og 2 skeiðar ananas (ferskum)
15 gr. hreint súkkulaðiprótein
Klaki

Allt sent í blandara nema próteinið, hakkað vel þar til áferðin er slétt, þá er próteininu bætt út í og því blandað létt við, alls ekki mikið!



Skref 4:
Jæja þá ertu búin að skoða skaðvaldana þína og átta þig á því hvað þú þarft að gera næstu 3 mánuði til að koma lífi þínu í jafnvægi, þ.e. hvað varðar matarræði og hreyfingu.
 
Skoðaðu listann þinn hvern einasta morgun áður en þú ferð út í daginn til að rifja þetta upp. Þetta stendur reyndar ekki í þessari bók, heldur er þetta meira stolið úr "Líkami fyrir lífið" og "Munkurinn sem seldi prestinn sinn", þú verður að minna sjálfa þig á hvert markmið þitt er.

Segðu einhverjum frá því hvað þú ert að fara að gera. Þá ertu búin að setja pressu á þig, þú þarft að framkvæma. Þetta er stolið upp úr "Munkurinn sem seldi sportbílinn sinn".

Finndu einhverja flík sem þig langar t.d. að komast eða þá að hún sé kóf víð á þér, settu þér líka markmið í fötum og mátaðu flíka í hverri einustu viku!

Borðaðu 3 x á dag á endurmótunartímanum. Ef þú verður svöng milli mála, vertu þá alltaf með ávöxt, hnetur, sojabaunir, gulrætur o.fl. við höndina, þannig að þú getur teygt þig í það.

- Gerðu máltíðirnar veglegar og þriggja rétta, þó þær séu hollar. Leggðu á borðið fyrir þriggja rétta máltíð, berðu þetta fram í réttri röð. Forrétturinn gæti verið í formi salats, aðalréttur í kjöti með smá kolvetnum, eftirréttur í formi ávaxtar. Þú gætir meira að segja haft máltíðina 5 rétta. Málið er þá bara að minnka skammtana enn meira :)

Eftir þessa 3 mánuði, þá getur þú jafnvel farið að leyfa þér aðeins meira, þú hefur vonandi fundið allavega jafnvægið, hvað þú þarf að gera til að finna jafnvægi. Kannski þarftu að taka lengri tíma til að þú náir þinni "þægindarþyngd", þ.e. þyngd sem þér líður vel í, þá endilega haltu áfram!

Ef þú stígur út af sporinu, þá getur þú alltaf tekið þig til og tekið hreinsunina með súpunni eða vatnsmelónunni!


Allt mitt prógram í þessu mun hefjast "formlega" 1. ágúst, þ.e. á morgun, en ég er þó núna búin að taka fyrsta daginn í vatnsmelónuhreinsuninni. Endilega sendið mér línu ef ykkur langar að spyrja einhvers, t.d. á blogginu (þið getið læst athugasemdum, þannig að aðeins ég sé). Ég verð því búin með 3 mánuðina 1. nóvember og vonandi hef ég náð mínu takmarki þá. En það má fylgjast með því í átakinu! :)